Gavìo mai provà... - L'opinione in dialetto/lingua veneta

Gavìo mai provà a vardare par television solo la reclan? On paradiso, tuti contenti. In faméia popà, mama e fioi tuti grassiosi, tuti zóvani, tuti sani.

Ela zè senpre in casa a netare pavimenti e bagni parchè riva la suocera. Ogni tanto la va sol prà a zugare “spada” co’ so fiolo fin che vien sera. Co’ la gà i “mestieri” la va fare on poco de movimento co’l paracadute. No la vede l’ora che i tosi riva casa sporchi onti cofà on luamaro par poder tacare la lavatrice che se carica da insìma par no’ far vegnèr male la schéna. 

E se no, èco la nona co’ la varechina. Par magnare, nessuna preoccupassion: ‘na scatoleta de sgonbro ciapà da on lupo de mare con dispresso del pericolo o fuasséte inpanà che le va magnà in conpagnia de on camaleonte. So marìo, invesse, el va in ufficio in elicotero e le colèghe de laòro le zé tute tochi de gnoca. 

Ghe zé in circolassion gome ‘mericane fenomenali: una la te dà on “respiro” ch’el fa spenotare on papagalo, chel’altra la fa scorezare giasso ai scoiatoli. I fioi zé senpre ubidienti, a scola zè dei sapientini che i alsa senpre la manina e no i barufa mai. L’unica disgrassia zé che i porta a casa i amissi par pissare in t’el bagno col deodorante novo. Verso i sinquanta ani ela la zé contenta solo col panesèlo giusto par no’ far sentire l’odore de pissin in assensore. 

A setanta ani, fra marìo e mojère nasse on mistero: uno dei dó gà la dentiera, ma nessun zé ancora sta bon capire qualo che l’è. Ma no’ zé tuto rose e viole: ogni tanto ghe zé calche disastro. Desso zé sucesso che on barcon co’ on pianoforte se gà roto in laguna. Zé ‘rivà quei che ‘na volta faséa i veterinari e i gà portà in salvo el piano, giusto par el concerto. “Zé stà diffissile, ma ghe la gavémo fata, can da l’oca!”. E i va a ciuciarse on amaro. Cossa volìo de pì? Bon’Ano a tuti.

Gianfranco Sinico

Corriere Vicentino Gennaio 2012

Posted in: Dialetto veneto,Gianfranco Sinico,Opinioni